ए॒ष य॒ज्ञो यद्-द॑शरा॒त्रः क॒कुत् प॑ञ्चद॒शः क॒कुदे॑कविꣳ॒॒शः क॒कुत् त्र॑यस्त्रिꣳ॒॒शो य ए॒वं ॅवि॒द्वान् द॑शरा॒त्रेण॒ यज॑ते त्रिक॒कुदे॒व स॑मा॒नानां᳚ भवति॒ यज॑मानः पञ्चद॒शो यज॑मान एकविꣳ॒॒शो यज॑मानस्त्रयस्त्रिꣳ॒॒शः पुर॒ इत॑रा अभिच॒र्यमा॑णो दशरा॒त्रेण॑ यजेत देवपु॒रा ए॒व पर्यू॑हते॒ तस्य॒ न कुत॑श्च॒नोपा᳚व्या॒धो भ॑वति॒ नैन॑मभि॒चरन्᳚थ् स्तृणुते देवासु॒राः संॅय॑त्ता आस॒न् ते दे॒वा ए॒ता - [ ]
पदपाठः (Word-by-word)
ए॒षः । य॒ज्ञ्ः । यत् । द॒श॒रा॒त्र इति॑ दश - रा॒त्रः । क॒कुत् । प॒ञ्च॒द॒श इति॑ पञ्च - द॒शः । क॒कुत् । ए॒क॒विꣳ॒॒श इत्ये॑क - विꣳ॒॒शः । क॒कुत् । त्र॒य॒स्त्रिꣳ॒॒श इति॑ त्रयः - त्रिꣳ॒॒शः । यः । ए॒वम् । वि॒द्वान् । द॒श॒रा॒त्रेणेति॑ दश - रा॒त्रेण॑ । यज॑ते । त्रि॒क॒कुदिति॑ त्रि - क॒कुत् । ए॒व । स॒मा॒नाना᳚म् । भ॒व॒ति॒ । यज॑मानः । प॒ञ्च॒द॒श इति॑ पञ्च -द॒शः । यज॑मानः । ए॒क॒विꣳ॒॒श इत्ये॑क - विꣳ॒॒शः । यज॑मानः । त्र॒य॒स्त्रिꣳ॒॒श इति॑ त्रयः - त्रिꣳ॒॒शः । पुरः॑ । इत॑राः । अ॒भि॒च॒र्यमा॑ण॒ इत्य॑भि - च॒र्यमा॑णः । द॒श॒रा॒त्रेणेति॑ दश - रा॒त्रेण॑ । य॒जे॒त॒ । दे॒व॒पु॒रा इति॑ देव-पु॒राः । ए॒व । परीति॑ । ऊ॒ह॒ते॒ । तस्य॑ । न । कुतः॑ । च॒न । उ॒पा॒व्या॒ध इत्यु॑प - आ॒व्या॒धः । भ॒व॒ति॒ । न । ए॒न॒म् । अ॒भि॒चर॒न्नित्य॑भि - चरन्न्॑ । स्तृ॒णु॒ते॒ । दे॒वा॒सु॒रा इति॑ देव-अ॒सु॒राः । संॅय॑त्ता॒ इति॒ सं - य॒त्ताः॒ । आ॒स॒न्न् । ते । दे॒वाः । ए॒ताः ।