दे॒वं ब॒र्॒.हिरिन्द्रꣳ॑ सुदे॒वं दे॒वैः । वी॒रव॑थ्-स्ती॒र्णं ॅवेद्या॑मवर्द्धयत् । वस्तो᳚र्वृ॒तं प्राक्तो᳚र्भृ॒तम् । रा॒या ब॒र्॒.हिष्म॒तोऽत्य॑गात् । व॒सु॒वने॑ वसु॒धेय॑स्य वेतु॒ यज॑ ॥ दे॒वीर्द्वार॒ इन्द्रꣳ॑ संघा॒ते । वि॒ड्वीर्याम॑न्नवर्द्धयन्न् । आ व॒थ्सेन॒ तरु॑णेन कुमा॒रेण॑ च मीवि॒ता अपार्वा॑णम् । रे॒णुक॑काटं नुदन्ताम् । व॒सु॒वने॑ वसु॒धेय॑स्य वियन्तु॒ यज॑ ।

दे॒वी उ॒षासा॒ नक्ता᳚ । इन्द्रं॑ ॅय॒ज्ञे प्र॑य॒त्य॑ह्वेताम् । दैवी॒र्विशः॒ प्राया॑सिष्टाम् । सुप्री॑ते॒ सुधि॑ते अभूताम् । व॒सु॒वने॑ वसु॒धेय॑स्य वीतां॒ ॅयज॑ ॥ दे॒वी जोष्ट्री॒ वसु॑धिती । दे॒वमिन्द्र॑मवर्द्धताम् । अया᳚व्य॒न्याऽघा द्वेषाꣳ॑सि । आऽन्या वा᳚क्षी॒द् वसु॒ वार्या॑णि । यज॑मानाय शिक्षि॒ते

व॒सु॒वने॑ वसु॒धेय॑स्य वीतां॒ ॅयज॑ ॥ दे॒वी ऊ॒र्जाहु॑ती॒ दुघे॑ सु॒दुघे᳚ । पय॒सेन्द्र॑मवर्द्धताम् । इष॒मूर्ज॑म॒न्या ऽवा᳚क्षीत् । सग्धिꣳ॒॒ सपी॑तिम॒न्या । नवे॑न॒ पूर्वं॒ दय॑माने । पु॒रा॒णेन॒ नव᳚म् । अधा॑ता॒-मूर्ज॑मू॒र्जाहु॑ती॒ वसु॒ वार्या॑णि । यज॑मानाय शिक्षि॒ते । व॒सु॒वने॑ वसु॒धेय॑स्य वीतां॒ ॅयज॑ ॥ 46(10)ट्.भ्.2.6.10.4दे॒वा दैव्या॒ होता॑रा । दे॒वमिन्द्र॑मवर्द्धताम् । ह॒ताघ॑शꣳ सा॒वाभा᳚र्ष्टां॒ ॅवसु॒ वार्या॑णि । यज॑मानाय शिक्षि॒तौ । व॒सु॒वने॑ वसु॒धेय॑स्य वीतां॒ ॅयज॑ ॥ दे॒वीस्ति॒स्रस्ति॒स्रो दे॒वीः । पति॒मिन्द्र॑मवर्द्धयन्न् । अस्पृ॑क्ष॒द्भार॑ती॒ दिव᳚म् । रु॒द्रैर्य॒ज्ञ्ꣳ सर॑स्वती । इडा॒ वसु॑मती गृ॒हान्

व॒सु॒वने॑ वसु॒धेय॑स्य वियन्तु॒ यज॑ ॥ दे॒व इन्द्रो॒ नरा॒शꣳसः॑ । त्रि॒व॒रू॒थ-स्त्रि॑वन्धु॒रः । दे॒वमिन्द्र॑मवर्द्धयत् । श॒तेन॑ शितिपृ॒ष्ठाना॒माहि॑तः । स॒हस्रे॑ण॒ प्रव॑र्तते । मि॒त्रावरु॒णेद॑स्य हो॒त्रमर्.ह॑तः । बृह॒स्पतिः॑ स्तो॒त्रम् । अ॒श्विनाऽऽद्ध्व॑र्यवम् । व॒सु॒वने॑ वसु॒धेय॑स्य वेतु॒ यज॑ ।

दे॒व इन्द्रो॒ वन॒स्पतिः॑ । हिर॑ण्यपर्णो॒ मधु॑शाखः सुपिप्प॒लः । दे॒वमिन्द्र॑मवर्द्धयत् । दिव॒मग्रे॑णाप्रात् । आऽन्तरि॑क्षं पृथि॒वीम॑दृꣳहीत् । व॒सु॒वने॑ वसु॒धेय॑स्य वेतु॒ यज॑ ॥ दे॒वं ब॒र॒.हिर्वारि॑तीनाम् । दे॒वमिन्द्र॑मवर्द्धयत् । स्वा॒स॒स्थ-मिन्द्रे॒णास॑न्नम् । अ॒न्या ब॒र्॒.हीꣳष्य॒भ्य॑भूत् ( ) । व॒सु॒वने॑ वसु॒धेय॑स्य वेतु॒ यज॑ ॥ दे॒वो अ॒ग्निः स्वि॑ष्ट॒कृत् । दे॒वमिन्द्र॑मवर्द्धयत् । स्वि॑ष्टं कु॒र्वन्थ् स्वि॑ष्ट॒कृत् । स्वि॑ष्टम॒द्य क॑रोतु नः । व॒सु॒वने॑ वसु॒धेय॑स्य वेतु॒ यजे॑ ।