ओष॑धीभ्यः॒ स्वाहा॒ मूले᳚भ्यः॒ स्वाहा॒ तूले᳚भ्यः॒ स्वाहा॒ काण्डे᳚भ्यः॒ स्वाहा॒ वल्.शे᳚भ्यः॒ स्वाहा॒ पुष्पे᳚भ्यः॒ स्वाहा॒ फले᳚भ्यः॒ स्वाहा॑ गृही॒तेभ्यः॒ स्वाहा ऽगृ॑हीतेभ्यः॒ स्वाहा ऽव॑पन्नेभ्यः॒ स्वाहा॒ शया॑नेभ्यः॒ स्वाहा॒ सर्व॑स्मै॒ स्वाहा᳚ ॥
पदपाठः (Word-by-word)
ओष॑धीभ्य॒ इत्योष॑धि-भ्यः॒ । स्वाहा᳚ । मूले᳚भ्यः । स्वाहा᳚ । तूले᳚भ्यः । स्वाहा᳚ । काण्डे᳚भ्यः । स्वाहा᳚ । वल्.शे᳚भ्यः । स्वाहा᳚ । पुष्पे᳚भ्यः । स्वाहा᳚ । फले᳚भ्यः । स्वाहा᳚ । गृ॒ही॒तेभ्यः॑ । स्वाहा᳚ । अगृ॑हीतेभ्यः । स्वाहा᳚ । अव॑पन्नेभ्य॒ इत्यव॑ - प॒न्ने॒भ्यः॒ । स्वाहा᳚ । शया॑नेभ्यः । स्वाहा᳚ । सर्व॑स्मै । स्वाहा᳚ ॥
भट्टभास्करभाष्यम् (Bhatta Bhaskara Commentary)
1 अथ ओषधिहोमाः - ओषधीभ्य इत्याद्याः ॥ ओषधीभ्यः फलपाकावसानाभ्यः । 'ओषधेश्च विभक्तावप्रथमायाम्' इति दीर्घत्वम् । मूलानि प्रसिद्धानि । तूलेभ्यः अग्रेम्यः । वल्शेभ्यः प्ररोहेभ्यः । गृहीतेभ्यः प्राणिभिरुपयुक्तेभ्यः पुष्पफलेभ्यः । अगृहीतेभ्यः स्वयंनिपतितेभ्यः । अवपन्नेभ्यः विपन्नेभ्यः । शयानेभ्यः स्तम्बशुष्केभ्यः ॥
इति सप्तमे तृतीये एकोनविंशोनुवाकः ॥