इ॒षे पी॑पिहि । ऊ॒र्जे पी॑पिहि । ब्रह्म॑णे पीपिहि । क्ष॒त्राय॑ पीपिहि । अ॒द्भ्यः पी॑पिहि । ओष॑धीभ्यः पीपिहि । वन॒स्पति॑भ्यः पीपिहि । द्यावा॑पृथि॒वीभ्या᳚म् पीपिहि । सु॒भू॒ताय॑ पीपिहि । ब्र॒ह्म॒व॒र्च॒साय॑ पीपिहि

यज॑मानाय पीपिहि । मह्य॒ञ्ज्यैष्ठ्या॑य पीपिहि ॥ त्विष्यै᳚ त्वा । द्यु॒म्नाय॑ त्वा । इ॒न्द्रि॒याय॑ त्वा॒ भूत्यै᳚ त्वा । धर्मा॑ऽसि सु॒धर्मा मे᳚ न्य॒स्मे । ब्रह्मा॑णि धारय । क्ष॒त्राणि॑ धारय । विश॑न्धारय । नेत्त्वा॒ वातः॑ स्क॒न्दया᳚त्

अ॒मुष्य॑ त्वा प्रा॒णे सा॑दयामि । अ॒मुना॑ स॒ह नि॑र॒र्त्थङ्ग॑च्छ । यो᳚ऽस्मान् द्वेष्टि॑ । यञ्च॑ व॒यं द्वि॒ष्मः ॥ पू॒ष्णे शर॑से॒ स्वाहा᳚ । ग्राव॑भ्यः॒ स्वाहा᳚ । प्र॒ति॒रेभ्यः॒ स्वाहा᳚ । द्यावा॑पृथि॒वीभ्याꣳ॒॒ स्वाहा᳚ । पि॒तृभ्यो॑ घर्म॒पेभ्यः॒ स्वाहा᳚ ॥ रु॒द्राय॑ रु॒द्रहो᳚त्रे॒ स्वाहा᳚

अह॒र् ज्योतिः॑ के॒तुना॑ जुषताम् । सु॒ज्यो॒तिर् ज्योति॑षाꣳ॒॒ स्वाहा᳚ । रात्रि॒र्ज्योतिः॑ के॒तुना॑ जुषताम् । सु॒ज्यो॒तिर्-ज्योति॑षाꣳ॒॒ स्वाहा᳚ । अपी॑परो॒ माऽह्नो॒ रात्रि॑यै मा पाहि । ए॒षा ते॑ अग्ने स॒मित् । तया॒ समि॑द्ध्यस्व । आयु॑र्मे दाः । वर्च॑सा माऽञ्जीः । अपी॑परो मा॒ रात्रि॑या॒ अह्नो॑ मा पाहि

ए॒षा ते॑ अग्ने स॒मित् । तया॒ समि॑द्ध्यस्व । आयु॑र्मे दाः । वर्च॑सा माऽञ्जीः । अ॒ग्निर्-ज्योति॒र्-ज्योति॑र॒ग्निः स्वाहा᳚ । सूर्यो॒ ज्योति॒र्-ज्योतिः॒ सूर्यः॒ स्वाहा᳚ । भूः स्वाहा᳚ । हु॒तꣳ ह॒विः । मधु॑ ह॒विः । इन्द्र॑तमे॒ऽग्नौ ( )

पि॒ता नो॑ऽसि॒ मा मा॑ हिꣳसीः । अ॒श्याम॑ ते देवघर्म । मधु॑मतो॒ वाज॑वतः पितु॒मतः॑ । अङ्गि॑रस्वतः स्वधा॒विनः॑ । अ॒शी॒महि॑ त्वा॒ मा मा॑ हिꣳसीः ॥ स्वाहा᳚ त्वा॒ सूर्य॑स्य र॒श्मिभ्यः॑ । स्वाहा᳚ त्वा॒ नक्ष॑त्रेभ्यः ।