दे॒वस्य॑ त्वा सवि॒तुः प्र॑स॒वे । अ॒श्विनो᳚र् बा॒हुभ्या᳚म् । पू॒ष्णो हस्ता᳚भ्या॒मा द॑दे ॥ अदि॑त्यै॒ रास्ना॑ऽसि । इड॒ एहि॑ । अदि॑त॒ एहि॑ । सर॑स्व॒त्येहि॑ । असा॒वेहि॑ । असा॒वेहि॑ । असा॒वेहि॑

अदि॑त्या उ॒ष्णीष॑मसि । वा॒युर॑स्यै॒डः । पू॒षा त्वो॒पाव॑सृजतु । अ॒श्विभ्या॒म् प्र दा॑पय । यस्ते॒ स्तनः॑ शश॒यो यो म॑यो॒भूः । येन॒ विश्वा॒ पुष्य॑सि॒ वार्या॑णि । यो र॑त्न॒धा व॑सु॒विद्यः सु॒दत्रः॑ । सर॑स्वति॒ तमि॒ह धात॑वेऽकः ॥ उस्र॑ घ॒र्मꣳ शिꣳ॑ष । उस्र॑ घ॒र्मम् पा॑हि

घ॒र्माय॑ शिꣳष । बृह॒स्पति॒स्त्वोप॑सीदतु । दान॑वः स्थ॒ पेर॑वः । वि॒ष्व॒ग्वृतो॒ लोहि॑तेन । अ॒श्विभ्या᳚म् पिन्वस्व । सर॑स्वत्यै पिन्वस्व । पू॒ष्णे पि॑न्वस्व । बृह॒स्पत॑ये पिन्वस्व । इन्द्रा॑य पिन्वस्व । इन्द्रा॑य पिन्वस्व

गा॒य॒त्रो॑ऽसि । त्रैष्टु॑भोऽसि । जाग॑तमसि । स॒होर्जो भा॒गेनोप॒ मेहि॑ । इन्द्रा᳚श्विना॒ मधु॑नः सार॒घस्य॑ । घ॒र्मम् पा॑त वसवो॒ यज॑ता॒ वट् । स्वाहा᳚ त्वा॒ सूर्य॑स्य र॒श्मये॑ वृष्टि॒वन॑ये जुहोमि । मधु॑ ह॒विर॑सि । सूर्य॑स्य॒ तप॑स्तप । द्यावा॑पृथि॒वीभ्यां᳚ त्वा॒ परि॑गृह्णामि ( )

अ॒न्तरि॑क्षेण॒ त्वोप॑यच्छामि । दे॒वानां᳚ त्वा पितृ॒णामनु॑मतो॒ भर्तुꣳ॑ शकेयम् । तेजो॑ऽसि । तेजोऽनु॒प्रेहि॑ । दि॒वि॒स्पृङ्मा मा॑ हिꣳसीः । अ॒न्त॒रि॒क्ष॒स्पृङ्मा मा॑ हिꣳसीः । पृ॒थि॒वि॒स्पृङ्मा मा॑ हिꣳसीः । सुव॑रसि॒ सुव॑र्मे यच्छ । दिवं॑ ॅयच्छ दि॒वो मा॑ पाहि ।