TA 7.11

9 पञ्चाशत्

॥
T.A.7.11.1
घर्म॒ या ते॑ दि॒वि शुक् । या गा॑य॒त्रे छन्द॑सि । या ब्रा᳚ह्म॒णे । या ह॑वि॒र्द्धाने᳚ । तान्त॑ ए॒तेनाव॑यजे॒ स्वाहा᳚ ॥ घर्म॒ या ते॒ऽन्तरि॑क्षे॒ शुक् । या त्रैष्टु॑भे॒ छन्द॑सि । या रा॑ज॒न्ये᳚ । याऽऽग्नी᳚द्ध्रे । तान्त॑ ए॒तेनाव॑यजे॒ स्वाहा᳚
▶ कोर्वै (Index)
(याऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒ ॅयुधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑)
T.A.7.11.2
घर्म॒ या ते॑ पृथि॒व्याꣳ शुक् । या जाग॑ते॒ छन्द॑सि । या वैश्ये᳚ । या सद॑सि । तान्त॑ ए॒तेनाव॑यजे॒ स्वाहा᳚ ॥ अनु॑नो॒ऽद्यानु॑मतिः{1} । अन्विद॑नुमते॒ त्वम् {2} । दि॒वस्त्वा॑ पर॒स्पायाः᳚ । अ॒न्तरि॑क्षस्य त॒नुवः॑ पाहि । पृ॒थि॒व्यास्त्वा॒ धर्म॑णा
▶ कोर्वै (Index)
(याऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒ ॅयुधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑)
T.A.7.11.3
व॒यमनु॑क्रामाम सुवि॒ताय॒ नव्य॑से ॥ ब्रह्म॑णस्त्वा पर॒स्पायाः᳚ । क्ष॒त्रस्य॑ त॒नुवः॑ पाहि । वि॒शस्त्वा॒ धर्म॑णा । व॒यमनु॑क्रामाम सुवि॒ताय॒ नव्य॑से ॥ प्रा॒णस्य॑ त्वा पर॒स्पायै᳚ । चक्षु॑षस्त॒नुवः॑ पाहि । श्रोत्र॑स्य त्वा॒ धर्म॑णा । व॒यमनु॑क्रामाम सुवि॒ताय॒ नव्य॑से ॥ व॒ल्गुर॑सि शं॒ ॅयुधा॑याः
▶ कोर्वै (Index)
(याऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒ ॅयुधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑)
T.A.7.11.4
शिशु॒र्-जन॑धायाः ॥ शञ्च॒ वक्षि॒ परि॑ च॒ वक्षि॑ । चतुः॑ स्रक्ति॒र्नाभि॑र्. ऋ॒तस्य॑ । सदो॑ वि॒श्वायुः॒ शर्म॑ स॒प्रथाः᳚ । अप॒ द्वेषो॒ अप॒ ह्वरः॑ । अ॒न्यद्व्र॑तस्य सश्चिम । घर्मै॒तत् तेऽन्न॑मे॒तत् पुरी॑षम् । तेन॒ वर्द्ध॑स्व॒ चा च॑ प्यायस्व । व॒र्द्धि॒षी॒महि॑ च व॒यम् । आ च॑ प्यासिषी॒महि॑ ।
▶ कोर्वै (Index)
(याऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒ ॅयुधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑)
T.A.7.11.5
रन्ति॒र्-नामा॑सि दि॒व्यो ग॑न्ध॒र्वः । तस्य॑ ते प॒द्वद्ध॑वि॒र्द्धान᳚म् । अ॒ग्निरद्ध्य॑क्षाः । रु॒द्रोऽधि॑पतिः ॥ सम॒हमायु॑षा । सम् प्रा॒णेन॑ । सं ॅवर्च॑सा । सम् पय॑सा । सङ्गौ॑प॒त्येन॑ । सꣳ रा॒यस्पोषे॑ण ।
▶ कोर्वै (Index)
(याऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒ ॅयुधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑)
T.A.7.11.6
व्य॑सौ । यो᳚ऽस्मान् द्वेष्टि॑ । यञ्च॑ व॒यं द्वि॒ष्मः ॥ अचि॑क्रद॒द्वृषा॒ हरिः॑ । म॒हान्-मि॒त्रो न द॑र्.श॒तः । सꣳ सूर्ये॑ण रोचते ॥ चिद॑सि समु॒द्रयो॑निः । इन्दु॒र् दक्षः॑ श्ये॒न ऋ॒तावा᳚ । हिर॑ण्यपक्षः शकु॒नो भु॑र॒ण्युः । म॒हान्थ् स॒धस्थे᳚ ध्रु॒व आनिष॑त्तः
▶ कोर्वै (Index)
(याऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒ ॅयुधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑)
T.A.7.11.7
नम॑स्ते अस्तु॒ मा मा॑ हिꣳसीः ॥ वि॒श्वाव॑सुꣳ सोम गन्ध॒र्वम् । आपो॑ ददृ॒शुषीः᳚ । तदृ॒तेना॒ व्या॑यन्न् । तद॒न्ववै᳚त् । इन्द्रो॑ रारहा॒ण आ॑साम् । परि॒ सूर्य॑स्य परि॒धीꣳ र॑पश्यत् ॥ वि॒श्वाव॑सुर॒भि तन्नो॑ गृणातु । दि॒व्यो ग॑न्ध॒र्वो रज॑सो वि॒मानः॑ । यद्वा॑ घा स॒त्यमु॒त यन्न वि॒द्म
▶ कोर्वै (Index)
(याऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒ ॅयुधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑)
T.A.7.11.8
धियो॑ हिन्वा॒नो धिय॒ इन्नो॑ अव्यात् ॥ सस्नि॑मविन्द॒च्चर॑णे न॒दीना᳚म् । अपा॑वृणो॒द्-दुरो॒ अश्म॑व्रजानाम् । प्रासा᳚न् गन्ध॒र्वो अ॒मृता॑नि वोचत् । इन्द्रो॒ दक्ष॒म् परि॑जानाद॒हीन᳚म् ॥ ए॒तत्त्वम् दे॑व घर्म दे॒वो दे॒वानुपा॑गाः । इ॒दम॒हम् म॑नु॒ष्यो॑ मनु॒ष्यान्॑ । सोम॑पी॒थानु॒ मेहि॑ । स॒ह प्र॒जया॑ स॒ह रा॒यस्पोषे॑ण ॥ सु॒मि॒त्रा न॒ आप॒ ओष॑धयः सन्तु ( )
▶ कोर्वै (Index)
(याऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒ ॅयुधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑)
T.A.7.11.9
दु॒र्मि॒त्रास्तस्मै॑ भूयासुः । यो᳚ऽस्मान् द्वेष्टि॑ । यञ्च॑ व॒यं द्वि॒ष्मः ॥ उद्व॒यन्तम॑स॒स्परि॑ {3} । उदु॒त्यं चि॒त्रम् {4} । इ॒ममू॒ षु त्यम॒स्मभ्यꣳ॑ स॒निम् । गा॒य॒त्रन्नवी॑याꣳसम् । अग्ने॑ दे॒वेषु॒ प्रवो॑चः ।
▶ कोर्वै (Index)
(याऽऽग्नी᳚द्ध्रे॒ तान्ता॑ ए॒तेनाव॑यजे॒ स्वाहा॒ - धर्म॑णा - शं॒ ॅयुधा॑याः - प्यासिषी॒महि॒-पोषे॑ण॒-निष॑त्तो-वि॒द्म-स॑न्-+त्व॒ष्टौ च॑)
← अनुवाकः 10 अनुवाकः 12 →