छन्द॑सा-मवत्वेकविꣳ॒॒शः स्तोमो॑ वैरा॒जꣳ साम॑ मि॒त्रावरु॑णौ दे॒वता॒ बलं॒ द्रवि॑ण-मू॒र्द्ध्वामा ति॑ष्ठ प॒ङ्क्तिस्त्वा॒ छन्द॑सामवतु त्रिणवत्रयस्त्रिꣳ॒॒शौ स्तोमौ॑ शाक्वररैव॒ते साम॑नी॒ बृह॒स्पति॑र् दे॒वता॒ वर्चो॒ द्रवि॑ण-मी॒दृङ् चा᳚न्या॒दृङ् चै॑ता॒दृङ् च॑ प्रति॒दृङ् च॑ मि॒तश्च॒ संमि॑तश्च॒ सभ॑राः । शु॒क्रज्यो॑तिश्च चि॒त्रज्यो॑तिश्च स॒त्यज्यो॑तिश्च॒ ज्योति॑ष्माꣳश्च स॒त्यश्च॑र्त॒पाश्चा - [ ]
पदपाठः (Word-by-word)
छन्द॑साम् । अ॒व॒तु॒ । ए॒क॒विꣳ॒॒श इत्ये॑क-विꣳ॒॒शः । स्तोमः॑ । वै॒रा॒जम् । साम॑ । मि॒त्रावरु॑णा॒विति॑ मि॒त्रा - वरु॑णौ । दे॒वता᳚ । बल᳚म् । द्रवि॑णम् । ऊ॒द्र्ध्वाम् । एति॑ । ति॒ष्ठ॒ । प॒ङ्क्तिः । त्वा॒ । छन्द॑साम् । अ॒व॒तु॒ । त्रि॒ण॒व॒त्र॒य॒स्त्रिꣳ॒॒शाविति॑ त्रिणव - त्र॒य॒स्त्रिꣳ॒॒शौ । स्तोमौ᳚ । शा॒क्व॒र॒रै॒व॒ते इति॑ शाक्वर-रै॒व॒ते । साम॑नी॒ इति॑ । बृह॒स्पतिः॑ । दे॒वता᳚ । वर्चः॑ । द्रवि॑णम् । ई॒दृङ् । च॒ । अ॒न्या॒दृङ् । च॒ । ए॒ता॒दृङ् । च॒ । प्र॒ति॒दृङिति॑ प्रति - दृङ् । च॒ । मि॒तः । च॒ । संमि॑त॒ इति॒ सं - मि॒तः॒ । च॒ । सभ॑रा॒ इति॒ स - भ॒राः॒ ॥ शु॒क्रज्यो॑ति॒रिति॑ शु॒क्र - ज्यो॒तिः॒ । च॒ । चि॒त्रज्यो॑ति॒रिति॑ चि॒त्र - ज्यो॒तिः॒ । च॒ । स॒त्यज्यो॑ति॒रिति॑ स॒त्य - ज्यो॒तिः॒ । च॒ । ज्योति॑ष्मान् । च॒ । स॒त्यः । च॒ । ऋ॒त॒पा इत्यृ॑त - पाः । च॒ ।