पर्व॑ता॒दा सर॑स्वती यज॒ता ग॑न्तु य॒ज्ञ्ं । हवं॑ दे॒वी जु॑जुषा॒णा घृ॒ताची॑ श॒ग्मां नो॒ वाच॑मुश॒ती शृ॑णोतु ॥ बृह॑स्पते जु॒षस्व॑ नो ह॒व्यानि॑ विश्वदेव्य । रास्व॒ रत्ना॑नि दा॒शुषे᳚ ॥ ए॒वा पि॒त्रे वि॒श्वदे॑वाय॒ वृष्णे॑ य॒ज्ञिर् वि॑धेम॒ नम॑सा ह॒विर्भिः॑ । बृह॑स्पते सुप्र॒जा वी॒रव॑न्तो व॒यꣳ स्या॑म॒ पत॑यो रयी॒णां ॥ बृह॑स्पते॒ अति॒ यद॒र्यो अर्.हा᳚द् द्यु॒मद् वि॒भाति॒ क्रतु॑म॒ज्जने॑षु । यद् दी॒दय॒च्छव॑स- [ ]
पदपाठः (Word-by-word)
पर्व॑तात् । एति॑ । सर॑स्वती । य॒ज॒ता । ग॒न्तु॒ । य॒ज्ञ्म् ॥ हव᳚म् । दे॒वी । जु॒जु॒षा॒णा । घृ॒ताची᳚ । श॒ग्माम् । नः॒ । वाच᳚म् । उ॒श॒ती । शृ॒णो॒तु॒ ॥ बृह॑स्पते । जु॒षस्व॑ । नः॒ । ह॒व्यानि॑ । वि॒श्व॒दे॒व्येति॑ विश्व-दे॒व्य॒ ॥ रास्व॑ । रत्ना॑नि । दा॒शुषे᳚ ॥ ए॒वा । पि॒त्रे । वि॒श्वदे॑वा॒येति॑ वि॒श्व-दे॒वा॒य॒ । वृष्णे᳚ । य॒ज्ञिः । वि॒धे॒म॒ । नम॑सा । ह॒विर्भि॒रिति॑ ह॒विः - भिः॒ ॥ बृह॑स्पते । सु॒प्र॒जा इति॑ सु - प्र॒जाः । वी॒रव॑न्त॒ इति॑ वी॒र - व॒न्तः॒ । व॒यम् । स्या॒म॒ । पत॑यः । र॒यी॒णाम् ॥ बृह॑स्पते । अतीति॑ । यत् । अ॒र्यः । अर्.हा᳚त् । द्यु॒मदिति॑ द्यु - मत् । वि॒भातीति॑ वि - भाति॑ । क्रतु॑म॒दिति॒ क्रतु॑ - म॒त् । जने॑षु ॥ यत् । दी॒दय॑त् । शव॑सा ।