र्तप्रजात॒ तद॒स्मासु॒ द्रवि॑णं धेहि चि॒त्रं ॥ आ नो॑ मित्रावरुणा घृ॒तैर् गव्यू॑तिमुक्षतं । मद्ध्वा॒ रजाꣳ॑सि सुक्रतू ॥ प्र बा॒हवा॑ सिसृतं जी॒वसे॑ न॒ आ नो॒ गव्यू॑ति-मुक्षतं घृ॒तेन॑ । आ नो॒ जने᳚ श्रवयतं ॅयुवाना श्रु॒तं मे॑ मित्रावरुणा॒ हवे॒मा ॥ अ॒ग्निं ॅवः॑ पू॒र्व्यं गि॒रा दे॒वमी॑डे॒ वसू॑नां । स॒प॒र्यन्तः॑ पुरुप्रि॒यं मि॒त्रं न क्षे᳚त्र॒साध॑सं ॥ म॒क्षू दे॒वव॑तो॒ रथः॒ - [ ]
पदपाठः (Word-by-word)
ऋ॒त॒प्र॒जा॒तेत्यृ॑त-प्र॒जा॒त॒ । तत् । अ॒स्मासु॑ । द्रवि॑णम् । धे॒हि॒ । चि॒त्रम् ॥ एति॑ । नः॒ । मि॒त्रा॒व॒रु॒णेति॑ मित्रा-व॒रु॒णा॒ । घृ॒तैः । गव्यू॑तिम् । उ॒क्ष॒त॒म् ॥ मद्ध्वा᳚ । रजाꣳ॑सि । सु॒क्र॒तू॒ इति॑ सु-क्र॒तू॒ ॥ प्रेति॑ । बा॒हवा᳚ । सि॒सृ॒त॒म् । जी॒वसे᳚ । नः॒ । एति॑ । नः॒ । गव्यू॑तिम् । उ॒क्ष॒त॒म् । घृ॒तेन॑ ॥ एति॑ । नः॒ । जने᳚ । श्र॒व॒य॒त॒म् । यु॒वा॒ना॒ । श्रु॒तम् । मे॒ । मि॒त्रा॒व॒रु॒णेति॑ मित्रा - व॒रु॒णा॒ । हवा᳚ । इ॒मा ॥ अ॒ग्निम् । वः॒ । पू॒र्व्यम् । गि॒रा । दे॒वम् । ई॒डे॒ । वसू॑नाम् ॥ स॒प॒र्यन्तः॑ । पु॒रु॒प्रि॒यमिति॑ पुरु-प्रि॒यम् । मि॒त्रम् । न । क्षे॒त्र॒साध॑स॒मिति॑ क्षेत्र - साध॑सम् ॥ म॒क्षु । दे॒वव॑त॒ इति॑ दे॒व - व॒तः॒ । रथः॑ ।