श्रव॒स्यवो॑ घृ॒तस्य॒ धारा॒ उप॑ यन्ति वि॒श्वतः॑ ॥सोमा॑रुद्रा॒ वि वृ॑हतं॒ ॅविषू॑ची॒ममी॑वा॒ या नो॒ गय॑-मावि॒वेश॑ । आ॒रे बा॑धेथां॒ निर्.ऋ॑तिं परा॒चैः कृ॒तं चि॒देनः॒ प्र मु॑मुक्त-म॒स्मत् ॥ सोमा॑रुद्रा यु॒व-मे॒तान्य॒स्मे विश्वा॑ त॒नूषु॑ भेष॒जानि॑ धत्तं । अव॑ स्यतं मु॒ञ्चतं॒ ॅयन्नो॒ अस्ति॑ त॒नूषु॑ ब॒द्धं कृ॒तमेनो॑ अ॒स्मत् ॥ सोमा॑पूषणा॒ जन॑ना रयी॒णां जन॑ना दि॒वो जन॑ना ( ) पृथि॒व्याः । जा॒तौ विश्व॑स्य॒ भुव॑नस्य गो॒पौ दे॒वा अ॑कृण्वन्न॒मृत॑स्य॒ नाभिं᳚ ॥ इ॒मौ दे॒वौ जाय॑मानौ जुषन्ते॒मौ तमाꣳ॑सि गूहता॒-मजु॑ष्टा । आ॒भ्यामिन्द्रः॑ प॒क्वमा॒मास्व॒न्तः सो॑मापू॒षभ्यां᳚ जनदु॒स्रिया॑सु ॥
पदपाठः (Word-by-word)
श्र॒व॒स्यवः॑ । घृ॒तस्य॑ । धाराः᳚ । उपेति॑ । य॒न्ति॒ । वि॒श्वतः॑ ॥ सोमा॑रु॒द्रेति॒ सोमा᳚-रु॒द्रा॒ । वीति॑ । वृ॒ह॒त॒म् । विषू॑चीम् । अमी॑वा । या । नः॒ । गय᳚म् । आ॒वि॒वेशेत्या᳚ - वि॒वेश॑ ॥ आ॒रे । बा॒धे॒था॒म् । निर्.ऋ॑ति॒मिति॒ निः - ऋ॒ति॒म् । प॒रा॒चैः । कृ॒तम् । चि॒त् । एनः॑ । प्रेति॑ । मु॒मु॒क्त॒म् । अ॒स्मत् ॥ सोमा॑रु॒द्रेति॒ सोमा᳚-रु॒द्रा॒ । यु॒वम् । ए॒तानि॑ । अ॒स्मे इति॑ । विश्वा᳚ । त॒नूषु॑ । भे॒ष॒जानि॑ । ध॒त्त॒म् । अवेति॑ । स्य॒त॒म् । मु॒ञ्चत᳚म् । यत् । नः॒ । अस्ति॑ । त॒नूषु॑ । ब॒द्धम् । कृ॒तम् । एनः॑ । अ॒स्मत् । सोमा॑पूष॒णेति॒ सोमा᳚ - पू॒ष॒णा॒ । जन॑ना । र॒यी॒णाम् । जन॑ना । दि॒वः । जन॑ना ( ) । पृ॒थि॒व्याः ॥ जा॒तौ । विश्व॑स्य । भुव॑नस्य । गो॒पौ । दे॒वाः । अ॒कृ॒ण्व॒न्न् । अ॒मृत॑स्य । नाभि᳚म् ॥ इ॒मौ । दे॒वौ । जाय॑मानौ । जु॒ष॒न्त॒ । इ॒मौ । तमाꣳ॑सि । गू॒ह॒ता॒म् । अजु॑ष्टा ॥ आ॒भ्याम् । इन्द्रः॑ । प॒क्वम् । आ॒मासु॑ । अ॒न्तः । सो॒मा॒पू॒षभ्या॒मिति॑ सोमापू॒ष - भ्या॒म् । ज॒न॒त् । उ॒स्रिया॑सु ॥