अक्ष॒न्नमी॑मदन्त॒ ह्यव॑ प्रि॒या अ॑धूषत । अस्तो॑षत॒ स्वभा॑नवो॒ विप्रा॒ नवि॑ष्ठया म॒ती । योजा॒ न्वि॑न्द्र ते॒ हरी᳚ ॥ अक्ष॑न् पि॒तरोऽमी॑मदन्त पि॒तरोऽती॑तृपन्त पि॒तरोऽमी॑मृजन्त पि॒तरः॑ ॥ परे॑त पितरः सोम्या गंभी॒रैः प॒थिभिः॑ पू॒र्व्यैः । अथा॑ पि॒तृन्थ् सु॑वि॒दत्राꣳ॒॒ अपी॑त य॒मेन॒ ये स॑ध॒मादं॒ मद॑न्ति ॥ मनो॒ न्वा हु॑वामहे नाराशꣳ॒॒सेन॒ स्तोमे॑न पितृ॒णां च॒ मन्म॑भिः ॥ आ - [ ]
पदपाठः (Word-by-word)
अक्षन्न्॑ । अमी॑मदन्त । हि । अवेति॑ । प्रि॒याः । अ॒धू॒ष॒त॒ ॥ अस्तो॑षत । स्वभा॑नव॒ इति॒ स्व-भा॒न॒वः॒ । विप्राः᳚ । नवि॑ष्ठया । म॒ती ॥ योजा᳚ । नु । इ॒न्द्र॒ । ते॒ । हरी॒ इति॑ ॥ अक्षन्न्॑ । पि॒तरः॑ । अमी॑मदन्त । पि॒तरः॑ ॥ अती॑तृपन्त । पि॒तरः॑ । अमी॑मृजन्त । पि॒तरः॑ । परेति॑ । इ॒त॒ । पि॒त॒रः॒ । सो॒म्याः॒ । ग॒भीं॒रैः । प॒थिभि॒रिति॑ प॒थि-भिः॒ । पू॒र्व्यैः ॥ अथ॑ । पि॒तॄन् । सु॒वि॒दत्रा॒निति॑ सु - वि॒दत्रान्॑ । अपीति॑ । इ॒त॒ । य॒मेन॑ । ये । स॒ध॒माद॒मिति॑ सध - माद᳚म् । मद॑न्ति ॥ मनः॑ । नु । एति॑ । हु॒वा॒म॒हे॒ । ना॒रा॒शꣳ॒॒सेन॑ । स्तोमे॑न । पि॒तृ॒णाम् । च॒ । मन्म॑भि॒रिति॒ मन्म॑ - भिः॒ ॥ एति॑ ।