-यथा॒ऽहं ॅयु॒ष्माꣳस्तप॒सा ऽसृ॑क्ष्ये॒वं तप॑सि प्र॒जन॑न-मिच्छद्ध्व॒मिति॒ तेभ्यो॒ऽग्निमा॒यत॑नं॒ प्राऽय॑च्छदे॒तेना॒ऽऽ*यत॑नेन श्राम्य॒तेति॒ ते᳚ऽग्निना॒ऽऽ*यत॑नेनाऽ-श्राम्य॒न् ते सं॑ॅवथ्स॒र एकां॒ गाम॑सृजन्त॒ तां ॅवसु॑भ्यो रु॒द्रेभ्य॑ आदि॒त्येभ्यः॒ प्राऽय॑च्छन्ने॒ताꣳ र॑क्षद्ध्व॒मिति॒ तां ॅवस॑वो रु॒द्रा आ॑दि॒त्या अ॑रक्षन्त॒ सा वसु॑भ्यो रु॒द्रेभ्य॑ आदि॒त्येभ्यः॒ प्राजा॑यत॒त्रीणि॑ च - [ ]
पदपाठः (Word-by-word)
यथा᳚ । अ॒हम् । यु॒ष्मान् । तप॑सा । असृ॑क्षि । ए॒वम् । तप॑सि । प्र॒जन॑न॒मिति॑ प्र - जन॑नम् । इ॒च्छ॒द्ध्व॒म् । इति॑ । तेभ्यः॑ । अ॒ग्निम् । आ॒यत॑न॒मित्या᳚ - यत॑नम् । प्रेति॑ । अ॒य॒च्छ॒त् । ए॒तेन॑ । आ॒यत॑ने॒नेत्या᳚ - यत॑नेन । श्रा॒म्य॒त॒ । इति॑ । ते । अ॒ग्निना᳚ । आ॒यत॑ने॒नेत्या᳚ - यत॑नेन । अ॒श्रा॒म्य॒न्न् । ते । सं॒ॅव॒थ्स॒र इति॑ सं - व॒थ्स॒रे । एका᳚म् । गाम् । अ॒सृ॒ज॒न्त॒ । ताम् । वसु॑भ्य॒ इति॒ वसु॑ - भ्यः॒ । रु॒द्रेभ्यः॑ । आ॒दि॒त्येभ्यः॑ । प्रेति॑ । अ॒य॒च्छ॒न्न् । ए॒ताम् । र॒क्ष॒द्ध्व॒म् । इति॑ । ताम् । वस॑वः । रु॒द्राः । आ॒दि॒त्याः । अ॒र॒क्ष॒न्त॒ । सा । वसु॑भ्य॒ इति॒ वसु॑ - भ्यः॒ । रु॒द्रेभ्यः॑ । आ॒दि॒त्येभ्यः॑ । प्रेति॑ । अ॒जा॒य॒त॒ । त्रीणि॑ । च॒ ।