श॒तानि॒ त्रय॑स्त्रिꣳशतं॒ चाथ॒ सैव स॑हस्रत॒म्य॑भव॒त् ते दे॒वाः प्र॒जाप॑तिमब्रुवन्थ् स॒हस्रे॑ण नो याज॒येति॒ सो᳚ऽग्निष्टो॒मेन॒ वसू॑नयाजय॒त् त इ॒मं ॅलो॒कम॑जय॒न् तच्चा॑ददुः॒ स उ॒क्थ्ये॑न रु॒द्रान॑याजय॒त् ते᳚ऽन्तरि॑क्षमजय॒न् तच्चा॑ददुः॒ सो॑ऽतिरा॒त्रेणा॑ऽऽ*दि॒त्यान॑याजय॒त् ते॑ऽमुं ॅलो॒कम॑जय॒न् तच्चा॑ददु॒ -स्तद॒न्तरि॑क्षं॒ - [ ]
पदपाठः (Word-by-word)
श॒तानि॑ । त्रय॑स्त्रिꣳशत॒मिति॒ त्रयः॑ - त्रिꣳ॒॒श॒त॒म् । च॒ । अथ॑ । सा । ए॒व । स॒ह॒स्र॒त॒मीति॑ सहस्र - त॒मी । अ॒भ॒व॒त् । ते । दे॒वाः । प्र॒जाप॑ति॒मिति॑ प्र॒जा - प॒ति॒म् । अ॒ब्रु॒व॒न्न् । स॒हस्रे॑ण । नः॒ । या॒ज॒य॒ । इति॑ । सः । अ॒ग्नि॒ष्टो॒मेनेत्य॑ग्नि-स्तो॒मेन॑ । वसून्॑ । अ॒या॒ज॒य॒त् । ते । इ॒मम् । लो॒कम् । अ॒ज॒य॒न्न् । तत् । च॒ । अ॒द॒दुः॒ । सः । उ॒क्थ्ये॑न । रु॒द्रान् । अ॒या॒ज॒य॒त् । ते । अ॒न्तरि॑क्षम् । अ॒ज॒य॒न्न् । तत् । च॒ । अ॒द॒दुः॒ । सः । अ॒ति॒रा॒त्रेणेत्य॑ति - रा॒त्रेण॑ । आ॒दि॒त्यान् । अ॒या॒ज॒य॒त् । ते । अ॒मुम् । लो॒कम् । अ॒ज॒य॒न्न् । तत् । च॒ । अ॒द॒दुः॒ । तत् । अ॒न्तरि॑क्षम् ।