ए॒व शꣳ॑स॒त्यथ॒ या स॑हस्रत॒मी सा होत्रे॒ देयेति॒ होता॑रं॒ ॅवा अ॒भ्यति॑रिच्यते॒ यद॑ति॒रिच्य॑ते॒ होता ऽना᳚प्तस्याऽऽ*पयि॒ता ऽथा॑ऽ*हुरुन्ने॒त्रे देयेत्यति॑रिक्ता॒ वा ए॒षा स॒हस्र॒स्याति॑रिक्त उन्ने॒तर्त्विजा॒मथा॑ऽऽ*हुः॒ सर्वे᳚भ्यः सद॒स्ये᳚भ्यो॒ देयेत्यथा॑ऽऽहुरुदा॒ कृत्या॒ सा वशं॑ चरे॒दित्यथा॑ऽऽ*हुर्ब्र॒ह्मणे॑ चा॒ग्नीधे॑ च॒ देयेति॒ - [ ]
पदपाठः (Word-by-word)
ए॒व । शꣳ॒॒स॒ति॒ । अथ॑ । या । स॒ह॒स्र॒त॒मीति॑ सहस्र - त॒मी । सा । होत्रे᳚ । देया᳚ । इति॑ । होता॑रम् । वै । अ॒भ्यति॑रिच्यत॒ इत्य॑भि-अति॑रिच्यते । यत् । अ॒ति॒रिच्य॑त॒ इत्य॑ति - रिच्य॑ते । होता᳚ । अना᳚प्तस्य । आ॒प॒यि॒ता । अथ॑ । आ॒हुः॒ । उ॒न्ने॒त्र इत्यु॑त् - ने॒त्रे । देया᳚ । इति॑ । अति॑रि॒क्तेत्यति॑ - रि॒क्ता॒ । वै । ए॒षा । स॒हस्र॑स्य । अति॑रिक्त॒ इत्यति॑ - रि॒क्तः॒ । उ॒न्ने॒तेत्यु॑त् - ने॒ता । ऋ॒त्विजा᳚म् । अथ॑ । आ॒हुः॒ । सर्वे᳚भ्यः । स॒द॒स्ये᳚भ्यः । देया᳚ । इति॑ । अथ॑ । आ॒हुः॒ । उ॒दा॒कृत्येत्यु॑त् - आ॒कृत्या᳚ । सा । वश᳚म् । च॒रे॒त् । इति॑ । अथ॑ । आ॒हुः॒ । ब्र॒ह्मणे᳚ । च॒ । अ॒ग्नीध॒ इत्य॑ग्नि - इधे᳚ । च॒ । देया᳚ । इति॑ ।