सꣳस्तु॑ता वि॒राज॑म॒भि सं प॑द्यन्ते॒ द्वे चर्चा॒वति॑ रिच्येते॒ एक॑या॒ गौरति॑रिक्त॒ एक॒याऽऽयु॑रू॒नः सु॑व॒र्गो वै लो॒को ज्योति॒रूर्ग्-वि॒राट्-थ्सु॑व॒र्गमे॒व तेन॑ लो॒कं ॅय॑न्ति रथन्त॒रं दिवा॒ भव॑ति रथन्त॒रं नक्त॒मित्या॑हु-र्ब्रह्मवा॒दिनः॒ केन॒ तदजा॒मीति॑ सौभ॒रं तृ॑तीयसव॒ने ब्र॑ह्मसा॒मं बृ॒हत् तन्म॑द्ध्य॒तो द॑धति॒ विधृ॑त्यै॒ तेनाजा॑मि ॥
पदपाठः (Word-by-word)
सꣳस्तु॑ता॒ इति॒ सं - स्तु॒ताः॒ । वि॒राज॒मिति॑ वि - राज᳚म् । अ॒भि । समिति॑ । प॒द्य॒न्ते॒ । द्वे इति॑ । च॒ । ऋचौ᳚ । अतीति॑ । रि॒च्ये॒ते॒ इति॑ । एक॑या । गौः । अति॑रिक्त॒ इत्यति॑ - रि॒क्तः॒ । एक॑या । आयुः॑ । ऊ॒नः । सु॒व॒र्ग इति॑ सुवः - गः । वै । लो॒कः । ज्योतिः॑ । ऊर्क् । वि॒राडिति॑ वि - राट् । सु॒व॒र्गमिति॑ सुवः-गम् । ए॒व । तेन॑ । लो॒कम् । य॒न्ति॒ । र॒थ॒न्त॒रमिति॑ रथं - त॒रम् । दिवा᳚ । भव॑ति । र॒थ॒न्त॒रमिति॑ रथं-त॒रम् । नक्त᳚म् । इति॑ । आ॒हुः॒ । ब्र॒ह्म॒वा॒दिन॒ इति॑ ब्रह्म-वा॒दिनः॑ । केन॑ । तत् । अजा॑मि । इति॑ । सौ॒भ॒रम् । तृ॒ती॒य॒स॒व॒न इति॑ तृतीय - स॒व॒ने । ब्र॒ह्म॒सा॒ममिति॑ ब्रह्म - सा॒मम् । बृ॒हत् । तन् । म॒द्ध्य॒तः । द॒ध॒ति॒ । विधृ॑त्या॒ इति॒ वि - धृ॒त्यै॒ । तेन॑ । अजा॑मि ॥