आ॒दि॒त्याश्चाङ्गि॑रसश्च सुव॒र्गे लो॒के᳚ऽस्पद्र्धन्त । तेऽङ्गि॑रस आदि॒त्येभ्यः॑ । अ॒मुमा॑दि॒त्य-मश्वꣳ॑ श्वे॒तं भू॒तं दक्षि॑णा-मनयन्न् । ते᳚ऽब्रुवन्न् । यं नोऽन᳚ष्ट । स वर्यो॑ऽभू॒दिति॑ । तस्मा॒दश्वꣳ॒॒ सव॒र्येत्या-ह्व॑यन्ति । तस्मा᳚द्य॒ज्ञे वरो॑ दीयते ॥ यत्प्र॒जाप॑ति॒-राल॒ब्धो-ऽश्वो-ऽभ॑वत् । तस्मा॒दश्वो॒ नाम॑ ।

यच्छ्वय॒दरु॒रासी᳚त् । तस्मा॒दर्वा॒ नाम॑ ॥ यथ्स॒द्यो वाजा᳚न् थ्स॒मज॑यत् । तस्मा᳚द्वा॒जी नाम॑ ॥ यदसु॑राणां ॅलो॒कानाद॑त्त । तस्मा॑दादि॒त्यो नाम॑ ॥ अ॒ग्निर्वा अ॑श्वमे॒धस्य॒ योनि॑रा॒यत॑नम् । सूर्यो॒-ऽग्नेर्योनि॑-रा॒यत॑नम् । यद॑श्वमे॒धे᳚-ऽग्नौ चित्य॑ उत्तरवे॒दि-मु॑प॒वप॑ति । योनि॑-मन्तमे॒वैन॑-मा॒यत॑नवन्तं करोति ।

योनि॑-माना॒यत॑नवान् भवति । स ए॒वं ॅवेद॑ ॥ प्रा॒णा॒पा॒नौ वा ए॒तौ दे॒वाना᳚म् । यद॑र्काश्वमे॒धौ । प्रा॒णा॒पा॒नावे॒वाव॑रुन्धे ॥ ओजो॒ बलं॒ ॅवा ए॒तौ दे॒वाना᳚म् । यद॑र्काश्वमे॒धौ । ओजो॒ बल॑मे॒वाव॑रुन्धे ॥ अ॒ग्निर्वा अ॑श्वमे॒धस्य॒ योनि॑-रा॒यत॑नम् । सूर्यो॒-ऽग्नेर्योनि॑-रा॒यत॑नम् ( ) । यद॑श्वमे॒धे᳚-ऽग्नौ चित्य॑ उत्तरवे॒दिं चि॒नोति॑ । ताव॑र्काश्वमे॒धौ । अ॒र्का॒श्व॒मे॒धावे॒वा व॑रुन्धे । अथो॑ अर्काश्व-मे॒धयो॑रे॒व प्रति॑तिष्ठति ।