सा॒वि॒त्र-म॒ष्टक॑पालं प्रा॒तर्निर्व॑पति । अ॒ष्टाक्ष॑रा गाय॒त्री । गा॒य॒त्रं प्रा॑तस्सव॒नं । प्रा॒त॒स्स॒व॒ना दे॒वैनं॑ गायत्रि॒या ॑007आ;छन्द॒सोऽधि॒ निर्मि॑मीते । अथो᳚ प्रातस्सव॒नमे॒व तेना᳚प्नोति । गा॒य॒त्रीं छन्दः॑ ॥ स॒वि॒त्रे प्र॑सवि॒त्र एका॑दश-कपालं म॒द्ध्यन्दि॑ने । एका॑दशाक्षरा त्रि॒ष्टुप् । त्रैष्टु॑भं॒ माद्ध्य॑न्दिनꣳ॒॒ सव॑नम् । माद्ध्य॑न्दिना-दे॒वैनꣳ॒॒ सव॑नात्त्रि॒ष्टुभः॒-छन्द॒सोऽधि॒ निर्मि॑मीते

अथो॒ माद्ध्य॑न्दिनमे॒व सव॑नं॒ तेना᳚प्नोति । त्रि॒ष्टुभं॒ छन्दः॑ ॥ स॒वि॒त्र आ॑सवि॒त्रे द्वाद॑श-कपाल-मपरा॒ह्णे । द्वाद॑शाक्षरा॒ जग॑ती । जाग॑तं तृतीय सव॒नम् । तृ॒ती॒य॒ स॒व॒नादे॒वैनं॒ जग॑त्या॒ ॑007आ;छन्द॒सोऽधि॒ निर्मि॑मीते । अथो॑ तृतीय सव॒नमे॒व तेना᳚प्नोति । जग॑तीं॒ छन्दः॑ ॥ ई॒श्व॒रो वा अश्वः॒ प्रमु॑क्तः॒ परां᳚ परा॒वतं॒ गन्तोः᳚ । इ॒ह धृतिः॒ स्वाहे॒ह विधृ॑तिः॒ स्वाहे॒ह रन्तिः॒ स्वाहे॒ह रम॑तिः॒ स्वाहेति॒ चत॑स्र॒ आहु॑ती-र्जुहोति ( )

चत॑स्रो॒ दिशः॑ । दि॒ग्भिरे॒वैनं॒ परि॑गृह्णाति ॥ आश्व॑त्थो व्र॒जो भ॑वति । प्र॒जाप॑ति-र्दे॒वेभ्यो॒ निला॑यत । अश्वो॑ रू॒पं कृ॒त्वा । सो᳚ऽश्व॒त्थे स॑म्ॅवथ्स॒र-म॑तिष्ठत् । तद॑श्व॒त्थस्या᳚-श्वत्थ॒त्वम् । यदाश्व॑त्थो व्र॒जो भव॑ति । स्व ए॒वैनं॒ ॅयोनौ॒ प्रति॑ष्ठापयति ।