ए॒क॒विꣳ॒॒शो᳚ऽग्निर्भ॑वति । ए॒क॒विꣳ॒॒शः स्तोमः॑ । एक॑विꣳशति॒र्यूपाः᳚ ॥ यथा॒ वा अश्वा॑ वर्.र्ष॒भा वा॒ वृषा॑णः सꣳस्फु॒रेरन्न्॑ । ए॒वमे॒तथ्स्तोमाः॒ सꣳस्फु॑रन्ते । यदे॑कविꣳ॒॒शाः । ते यथ्स॑मृ॒च्छेरन्न्॑ । ह॒न्येता᳚स्य य॒ज्ञ्ः ॥ द्वा॒द॒श ए॒वाग्निः स्या॒दित्या॑हुः । द्वा॒द॒शः स्तोमः॑

एका॑दश॒ यूपाः᳚ ॥ यद्द्वा॑द॒शो᳚-ऽग्निर्भव॑ति । द्वाद॑श॒ मासाः᳚ सम्ॅवथ्स॒रः । स॒म्ॅव॒थ्स॒रेणै॒वास्मा॒ अन्न॒मव॑रुन्धे ॥ यद्दश॒ यूपा॒ भव॑न्ति । दशा᳚क्षरा वि॒राट् । अन्नं॑ ॅवि॒राट् । वि॒राजै॒वान्नाद्य॒-मव॑रुन्धे । य ए॑काद॒शः । स्तन॑ ए॒वास्यै॒ सः

दु॒ह ए॒वैनां॒ तेन॑ ॥ तदा॑हुः । यद्द्वा॑द॒शो᳚ऽग्निः स्या᳚द्द्वाद॒शः स्तोम॒ एका॑दश॒ यूपाः᳚ । यथा॒ स्थूरि॑णा या॒यात् । ता॒दृक्तत् ॥ ए॒क॒विꣳ॒॒श ए॒वाग्निः स्या॒दित्या॑हुः । ए॒क॒विꣳ॒॒शः स्तोमः॑ । एक॑विꣳशति॒र्यूपाः᳚ । यथा॒ प्रष्टि॑भि॒र्याति॑ । ता॒दृगे॒व तत् ।

यो वा अ॑श्वमे॒धे ति॒स्रः क॒कुभो॒ वेद॑ । क॒कुद्ध॒ राज्ञां᳚ भवति । ए॒क॒विꣳ॒॒शो᳚-ऽग्निर्भ॑वति । ए॒क॒विꣳ॒॒शः स्तोमः॑ । एक॑विꣳशति॒र्यूपाः᳚ । ए॒ता वा अ॑श्वम॒धे ति॒स्रः क॒कुभः॑ । य ए॒वं ॅवेद॑ । क॒कुद्ध॒ राज्ञां᳚ भवति ॥ यो वा अ॑श्वमे॒धे त्रीणि॑ शी॒र्॒.षाणि॒ वेद॑ । शिरो॑ ह॒ राज्ञां᳚ भवति ( ) । ए॒क॒विꣳ॒॒शो᳚-ऽग्निर्भ॑वति । ए॒क॒विꣳ॒॒शः स्तोमः॑ । एक॑विꣳशति॒र्यूपाः᳚ । ए॒तानि॒ वा अ॑श्वमे॒धे त्रीणि॑ शी॒र॒.षाणि॑ । य ए॒वं ॅवेद॑ । शिरो॑ ह॒ राज्ञां᳚ भवति ।