ए॒क॒यू॒पो वै॑काद॒शिनी॑ वा । अ॒न्येषां᳚ ॅय॒ज्ञानां॒ ॅयूपा॑ भवन्ति । ए॒क॒वि॒॒शिन्य॑-श्वमे॒धस्य॑ । सु॒व॒र्गस्य॑ लो॒कस्या॒-भिजि॑त्यै ॥ बै॒ल॒.वो वा॑ खादि॒रो वा॑ पाला॒शो वा᳚ । अ॒न्येषां᳚ ॅयज्ञ्क्रतू॒नां ॅयूपा॑ भवन्ति । राज्जु॑दाल॒ एक॑विꣳशत्य-रत्निरश्वमे॒धस्य॑ । सु॒व॒र्गस्य॑ लो॒कस्य॒ सम॑ष्ट्यै ॥ नान्येषां᳚ पशू॒नां ते॑ज॒न्या अ॑व॒द्यन्ति॑ । अव॑द्य॒न्त्यश्व॑स्य

पा॒प्मा वै ते॑ज॒नी । पा॒प्मनोऽप॑हत्यै ॥ प्ल॒क्ष॒शा॒खाया॑म॒न्येषां᳚ पशू॒नाम॑व॒द्यन्ति॑ । वे॒त॒स॒-शा॒खाया॒-मश्व॑स्य । अ॒फ्सुयो॑नि॒र्वा अश्वः॑ । अ॒फ्सु॒जो वे॑त॒सः । स्व ए॒वास्य॒ योना॒व-व॑द्यति ॥ यूपे॑षु ग्रा॒म्यान् प॒शून्नि॑-यु॒ञ्जन्ति॑ । आ॒रो॒केष्वा॑-र॒ण्यान्धा॑रयन्ति । प॒शू॒नां ॅव्यावृ॑त्त्यै ( ) ॥ आ ग्रा॒म्यान् प॒शून्-ॅलभ॑न्ते । प्रार॒ण्यान्थ्सृ॑जन्ति । पा॒प्मनो-ऽप॑हत्यै ।