पुरु॑षो॒ वै य॒ज्ञ्ः । य॒ज्ञ्ः प्र॒जाप॑तिः । यदश्वे॑ प॒शून्नि॑यु॒ञ्जन्ति॑ । य॒ज्ञादे॒व तद्य॒ज्ञ्ं प्रयु॑ङ्क्ते ॥ अश्वं॑ तूप॒रं गो॑मृ॒गम् । तान॑ग्नि॒ष्ठ आल॑भते । से॒ना॒मु॒खमे॒व तथ्सꣳश्य॑ति । तस्मा᳚द् राजमु॒खं भी॒ष्मं भावु॑कम् ॥ आ॒ग्ने॒यं कृ॒ष्णग्री॑वं पु॒रस्ता᳚-ल्ल॒लाटे᳚ । पू॒र्वा॒ग्निमे॒व तं कु॑रुते

तस्मा᳚-त्पूर्वा॒ग्निं पु॒रस्ता᳚-थ्स्थापयन्ति ॥ पौ॒ष्णम॒न्वञ्च᳚म् । अन्नं॒ ॅवै पू॒षा । तस्मा᳚-त्पूर्वा॒ग्ना-वा॑हा॒र्य॑-माह॑रन्ति ॥ ऐ॒न्द्रा॒पौ॒ष्ण मु॒परि॑ष्टात् । ऐ॒न्द्रो वै रा॑ज॒न्योऽन्नं॑ पू॒षा । अ॒न्नाद्ये॑नै॒वैन॑-मुभ॒यतः॒ परि॑गृह्णाति । तस्मा᳚द् राज॒न्यो᳚न्ना॒दो भावु॑कः ॥ आ॒ग्ने॒यौ कृ॒ष्णग्री॑वौ बाहु॒वोः । बा॒हु॒वोरे॒व वी॒र्यं॑ धत्ते

तस्मा᳚द् राज॒न्यो॑ बाहुब॒ली भावु॑कः ॥ त्वा॒ष्ट्रौ लो॑मशस॒क्थौ स॒क्थ्योः । स॒क्थ्योरे॒व वी॒र्यं॑ धत्ते । तस्मा᳚द् राज॒न्य॑ ऊरुब॒ली भावु॑कः ॥ शि॒ति॒पृ॒ष्ठौ बा॑र्.हस्प॒त्यौ पृ॒ष्ठे । ब्र॒ह्म॒व॒र्च॒स-मे॒वोपरि॑ष्टाद्धत्ते । अथो॑ क॒वचे॑ ए॒वैते अ॒भितः॒ पर्यू॑हते । तस्मा᳚द् राज॒न्यः॑ सन्न॑द्धो वी॒र्यं॑ करोति ॥ धा॒त्रे पृ॑षोद॒र-म॒धस्ता᳚त् । प्र॒ति॒ष्ठामे॒वैतां कु॑रुते ( ) । अथो॑ इ॒यं ॅवै धा॒ता । अ॒स्यामे॒व प्रति॑तिष्ठति ॥ सौ॒र्यं ब॒लक्षं॒ पुच्छे᳚ । उ॒थ्से॒धमे॒व तं कु॑रुते । तस्मा॑दुथ्से॒धं भ॒ये प्र॒जा अ॒भिसꣳश्र॑यन्ति ।