परि॑ दत्ते॒ह सर्वे᳚ ॥ग्री॒ष्मो हे॑म॒न्त उ॒त नो॑ वस॒न्तः श॒रद् व॒र्॒.षाः सु॑वि॒तन्नो॑ अस्तु । तेषा॑मृतू॒नाꣳ श॒त शा॑रदानां निवा॒त ए॑षा॒मभ॑ये स्याम ॥इ॒दु॒व॒थ्स॒राय॑ परिवथ्स॒राय॑ संवॅथ्स॒राय॑ कृणुता बृ॒हन्नमः॑ । तेषां᳚ ॅव॒यꣳ सु॑म॒तौ य॒ज्ञिया॑नां॒ ज्योगजी॑ता॒ अह॑ताः स्याम ॥ भ॒द्रान्नः॒ श्रेयः॒ सम॑नैष्ट देवा॒स्त्वया॑ऽव॒सेन॒ सम॑शीमहि त्वा ।स नो॑ मयो॒ भूः पि॑तो॒ - [ ]
पदपाठः (Word-by-word)
परीति॑ । द॒त्त॒ । इ॒ह । सर्वे᳚ ॥ ग्री॒ष्मः । हे॒म॒न्तः । उ॒त । नः॒ । व॒स॒न्तः । श॒रत् । व॒र्.॒षाः । सु॒वि॒तम् । नः॒ । अ॒स्तु॒ ॥ तेषा᳚म् । ऋ॒तू॒नाम् । श॒तशा॑रदाना॒मिति॑ श॒त - शा॒र॒दा॒ना॒म् । नि॒वा॒त इति॑ नि - वा॒ते । ए॒षा॒म् । अभ॑ये । स्या॒म॒ ॥ इ॒दु॒व॒थ्स॒रायेती॑दु - व॒थ्स॒राय॑ । प॒रि॒व॒थ्स॒रायेति॑ परि - व॒थ्स॒राय॑ । सं॒ॅव॒थ्स॒रायेति॑ सं - व॒थ्स॒राय॑ । कृ॒णु॒त॒ । बृ॒हत् । नमः॑ ॥ तेषा᳚म् । व॒यम् । सु॒म॒ताविति॑ सु - म॒तौ । य॒ज्ञिया॑नाम् । ज्योक् । अजी॑ताः । अह॑ताः । स्या॒म॒ ॥ भ॒द्रात् । नः॒ । श्रेयः॑ । समिति॑ । अ॒नै॒ष्ट॒ । दे॒वाः॒ । त्वया᳚ । अ॒व॒सेन॑ । समिति॑ । अ॒शी॒म॒हि॒ । त्वा॒ ॥ सः । नः॒ । म॒यो॒भूरिति॑ मयः-भूः । पि॒तो॒ इति॑ ।