धामेत्या॑है॒षा वा अ॒ग्नेः स्व॑यं चि॒तिर॒ग्निरे॒व तद॒ग्निं चि॑नोति॒ नाद्ध्व॒र्युरा॒त्मनो॒ऽन्तरे॑ति॒ चत॑स्र॒ आशाः॒ प्रच॑रन्त्व॒ग्नय॑ इ॒मं नो॑ य॒ज्ञ्ं न॑यतु प्रजा॒नन्न् । घृ॒तं पिन्व॑न्न॒जरꣳ॑ सु॒वीरं॒ ब्रह्म॑ स॒मिद्-भ॑व॒त्याहु॑तीनां ॥सु॒व॒र्गाय॒ वा ए॒ष लो॒कायोप॑ धीयते॒ यत् कू॒र्मश्चत॑स्र॒ आशाः॒ प्र च॑रन्त्व॒ग्नय॒ इत्या॑ह॒ - [ ]
पदपाठः (Word-by-word)
धाम॑ । इति॑ । आ॒ह॒ । ए॒षा । वै । अ॒ग्नेः । स्व॒यं॒चि॒तिरिति॑ स्वयं - चि॒तिः । अ॒ग्निः । ए॒व । तत् । अ॒ग्निम् । चि॒नो॒ति । न । अ॒द्ध्व॒र्युः । आ॒त्मनः॑ । अ॒न्तः । ए॒ति॒ । चत॑स्रः । आशाः᳚ । प्रेति॑ । च॒र॒न्तु॒ । अ॒ग्नयः॑ । इ॒मम् । नः॒ । य॒ज्ञ्म् । न॒य॒तु॒ । प्र॒जा॒नन्निति॑ प्र - जा॒नन्न् ॥ घृ॒तम् । पिन्वन्न्॑ । अ॒जर᳚म् । सु॒वीर॒मिति॑ सु-वीर᳚म् । ब्रह्म॑ । स॒मिदिति॑ सं - इत् । भ॒व॒ति॒ । आहु॑तीना॒मित्या - हु॒ती॒ना॒म् ॥ सु॒व॒र्गायेति॑ सुवः - गाय॑ । वै । ए॒षः । लो॒काय॑ । उपेति॑ । धी॒य॒ते॒ । यत् । कू॒र्मः । चत॑स्रः । आशाः᳚ । प्रेति॑ । च॒र॒न्तु॒ । अ॒ग्नयः॑ । इति॑ । आ॒ह॒ ।