अ॒णो-रणी॑यान् मह॒तो मही॑या-ना॒त्मा गुहा॑यां॒ निहि॑तोऽस्य ज॒न्तोः । तम॑क्रतुं पश्यति वीतशो॒को धा॒तुः प्र॒सादा᳚न्-महि॒मान॑मीशं ॥ स॒प्त प्रा॒णाः प्र॒भव॑न्ति॒ तस्मा᳚थ् स॒प्तार्चिषः॑ स॒मिधः॑ स॒प्त जि॒ह्वाः । स॒प्त इ॒मे लो॒का येषु॒ चर॑न्ति प्रा॒णा गु॒हाश॑या॒-न्निहि॑ताः स॒प्त स॑प्त ॥ अतः॑ समु॒द्रा गि॒रय॑श्च॒ सर्वे॒ऽस्माथ् स्यन्द॑न्ते॒ सिन्ध॑वः॒ सर्व॑रूपाः । अत॑श्च॒ विश्वा॒ ओष॑धयो॒ रसा᳚च्च॒ येनै॑ष भू॒त-स्ति॑ष्ठत्यन्तरा॒त्मा ॥ ब्र॒ह्मा दे॒वानां᳚ पद॒वीः क॑वी॒ना-मृषि॒र्-विप्रा॑णां महि॒षो मृ॒गाणां᳚ । श्ये॒नो गृध्रा॑णाꣳ॒॒ स्वधि॑ति॒र्-वना॑नाꣳ॒॒ सोमः॑ प॒वित्र॒ मत्ये॑ति॒ रेभन्न्॑ ॥ अ॒जा मेकां॒ ॅलोहि॑त-शुक्ल-कृ॒ष्णां ब॒ह्वीं प्र॒जां ज॒नय॑न्तीꣳ॒॒ सरू॑पां । अ॒जो ह्येको॑ जु॒षमा॑णोऽनु॒शेते॒ जहा᳚त्येनां भु॒क्त-भो॑गा॒मजो᳚ऽन्यः ।

हꣳ॒॒सः शु॑चि॒षद् वसु॑-रन्तरिक्ष॒-सद्धोता॑ वेदि॒ष-दति॑थिर्-दुरोण॒सत् । नृ॒षद्व॑र॒-सदृ॑त॒-सद् व्यो॑म॒-सद॒ब्जा गो॒जा ऋ॑त॒जा अ॑द्रि॒जा ऋ॒तं बृ॒हत् ॥ घृ॒तं मि॑मिक्षिरे घृ॒तम॑स्य॒ योनि॑र्-घृ॒ते श्रि॒तो घृ॒तमु॑वस्य॒ धाम॑ । अ॒नु॒ष्व॒धमाव॑ह मा॒दय॑स्व॒ स्वाहा॑ कृतं ॅवृषभ वक्षि ह॒व्यं ॥ स॒मु॒द्रा दू॒र्मिर्-मधु॑माꣳ॒॒ उदा॑र-दुपाꣳ॒॒शुना॒ सम॑मृत॒त्व मा॑नट् । घृ॒तस्य॒ नाम॒ गुह्यं॒ ॅयदस्ति॑ जि॒ह्वा दे॒वाना॑-म॒मृत॑स्य॒ नाभिः॑ ॥ व॒यं नाम॒ प्रब्र॑वामा घृ॒तेना॒स्मिन्. य॒ज्ञे धा॑रयामा॒ नमो॑भिः । उप॑ ब्र॒ह्मा शृ॑णवच्छ॒स्यमा॑नं॒ चतुः॑ शृङ्गो ऽवमीद् गौ॒र ए॒तत् ॥ च॒त्वारि॒ शृङ्गा॒ त्रयो॑ अस्य॒ पादा॒ द्वे शी॒र॒.षे स॒प्त हस्ता॑सो अ॒स्य । त्रिधा॑ ब॒द्धो वृ॑ष॒भो रो॑रवीति म॒हो दे॒वो मर्त्याꣳ॒॒ आवि॑वेश ।

त्रिधा॑ हि॒तं प॒णिभि॑र् गु॒ह्यमा॑नं॒ गवि॑-दे॒वासो॑ घृ॒तमन्व॑विन्दन्न् । इन्द्र॒ एकꣳ॒॒ सूर्य॒ एकं॑ जजान वे॒ना देकꣳ॑ स्व॒धया॒ निष्ट॑तक्षुः ॥ यो दे॒वानां᳚ प्रथ॒मं पु॒रस्ता॒द् विश्वा॒धियो॑ रु॒द्रो म॒हर्.षिः॑ । हि॒र॒ण्य॒ग॒र्भं प॑श्यत॒ जाय॑मानꣳ॒॒ सनो॑ दे॒वः शु॒भया॒ स्मृत्या॒ सम्ॅयु॑नक्तु ॥ यस्मा॒त्परं॒ नाप॑र॒ मस्ति॒ किञ्चि॒द्यस्मा॒न् नाणी॑यो॒ न ज्यायो᳚ऽस्ति॒ कश्चि॑त् । वृ॒क्ष इ॑व स्तब्धो दि॒वि ति॑ष्ठ॒-त्येक॒स्तेने॒दं पू॒र्णं पुरु॑षेण॒ सर्वं᳚ ॥ न कर्म॑णा न प्र॒जया॒ धने॑न॒ त्यागे॑नैके अमृत॒त्व-मा॑न॒शुः । परे॑ण॒ नाकं॒ निहि॑तं॒ गुहा॑यां ॅवि॒भ्राज॑दे॒तद् यत॑यो वि॒शन्ति॑ ॥ वे॒दा॒न्त॒ वि॒ज्ञान॒-सुनि॑श्चिता॒र्थाः सन्या॑स यो॒गाद्यत॑यः शुद्ध॒ सत्त्वाः᳚ । ते ब्र॑ह्मलो॒के तु॒ परा᳚न्तकाले॒ परा॑मृता॒त् परि॑मुच्यन्ति॒ सर्वे᳚ ( ) ॥ द॒ह्रं॒ ॅवि॒पा॒पं प॒रमे᳚श्म भूतं॒ ॅयत् पु॑ण्डरी॒कं पु॒रम॑द्ध्य सꣳ॒॒स्थं । त॒त्रा॒पि॒ द॒ह्रं ग॒गनं॑ ॅविशोक॒-स्तस्मि॑न्. यद॒न्तस्त-दुपा॑सित॒व्यं ॥ यो वेदादौ स्व॑रः प्रो॒क्तो॒ वे॒दान्ते॑ च प्र॒तिष्ठि॑तः । तस्य॑ प्र॒कृति॑-लीन॒स्य॒ यः॒ परः॑ स॒ म॒हेश्व॑रः ।