अ॒ष्टयो॑नी-म॒ष्टपु॑त्रां । अ॒ष्टप॑त्नी-मि॒मां महीं᳚ । अ॒हं ॅवेद॒ न मे॑ मृत्युः । न चामृ॑त्युर॒घाह॑रत् ॥ अ॒ष्टयो᳚न्य॒ष्ट पु॑त्रं । अ॒ष्टप॑दि॒द-म॒न्तरि॑क्षं । अ॒हं ॅवेद॒ न मे॑ मृत्युः । न चामृ॑त्युर॒घाह॑रत् । अ॒ष्टयो॑नी-म॒ष्टपु॑त्रां । अ॒ष्टप॑त्नी-म॒मून्दिवं᳚

अ॒हं ॅवेद॒ न मे॑ मृत्युः । न चामृ॑त्युर॒घाह॑रत् ॥ “सु॒त्रामा॑णं{3}” “म॒हीमू॒षु”{4} ॥ अदि॑ति॒र्द्यौ-रदि॑ति-र॒न्तरि॑क्षं । अदि॑ति र्मा॒ता स पि॒ता स पु॒त्रः । विश्वे॑ दे॒वा अदि॑तिः॒ पञ्च॒ जनाः᳚ । अदि॑तिर्-जा॒त-मदि॑ति॒र्-जनि॑त्वं ॥ अ॒ष्टौ पु॒त्रासो॒ अदि॑तेः । ये जा॒ता स्त॒न्वः॑ परि॑ । दे॒वाॅ (2) उप॑प्रैथ् स॒प्तभिः॑

प॒रा॒ मा॒र्ता॒ण्डमास्य॑त् ॥ स॒प्तभिः॑ पु॒त्रै-रदि॑तिः । उप॒ प्रैत् पू॒र्व्यं॑ ॅयुगं᳚ । प्र॒जायै॑ मृ॒त्यवे त॑त् । प॒रा॒ मा॒र्ता॒ण्ड-माभ॑र॒दिति॑ ॥ ताननुक्र॑मिष्या॒मः ॥ मि॒त्रश्च॒ वरु॑णश्च । धा॒ता चा᳚र्य॒मा च॑ । अꣳश॑श्च॒ भग॑श्च । इन्द्रश्च विवस्वाꣳ॑श्चेत्ये॒ते ( ) ॥ "हि॒र॒ण्य॒ग॒र्भो{5}” “हꣳ॒॒सःशु॑चि॒षत्{6}” । “ब्रह्म॑ जज्ञा॒नं{7}” “तदित् प॒द{8}” मिति॑ ॥ ग॒र्भः प्रा॑जाप॒त्यः । अथ॒ पुरु॑षः स॒प्तपुरु॑षः ।