क्वेदमभ्रं॑ निवि॒शते । क्वायꣳ॑ सम्ॅवथ्स॒रो मि॑थः । क्वाहः क्वेयन् दे॑व रा॒त्री । क्व मासा ऋ॑तवः॒ श्रिताः ॥ अर्द्धमासा॑ मुहू॒र्ताः । निमेषास्तु॑टिभिः॒ (निमेषास्त्र॑टिभिः॒) सह । क्वेमा आपो नि॑विश॒न्ते । य॒दीतो॑ यान्ति॒ संप्र॑ति ॥ काला अफ्सु नि॑विश॒न्ते । आ॒पः सूर्ये॑ स॒माहि॑ताः

अभ्रा᳚ण्य॒पः प्र॑पद्य॒न्ते । वि॒द्युथ्सूर्ये॑ स॒माहि॑ता ॥ अनवर्णे इ॑मे भू॒मी । इ॒यञ्चा॑सौ च॒ रोद॑सी ॥ किꣳ स्विदत्रान्त॑रा भू॒तं । ये॒नेमे वि॑धृते॒ उभे । वि॒ष्णुना॑ विधृ॑ते भू॒मी । इ॒ति व॑थ्सस्य॒ वेद॑ना ॥ इरा॑वती धेनु॒मती॒ हि भू॒तं । सू॒य॒व॒सिनी॒ मनु॑षे दश॒स्ये᳚

व्य॑ष्टभ्ना॒-द्रोद॑सी॒ विष्ण॑वे॒ते । दा॒धर्थ॑ पृथि॒वी-म॒भितो॑ म॒यूखैः᳚ ॥ किन्त-द्विष्णो र्बल॑मा॒हुः । का॒ दीप्तिः॑ किं प॒राय॑णं । एको॑ य॒द्धा-र॑य द्दे॒वः । रे॒जती॑ रोद॒सी उ॑भे ॥ वाताद्विष्णोर् ब॑ल मा॒हुः । अ॒क्षरा᳚द् दीप्ति॒ रुच्य॑ते । त्रि॒पदा॒द्धार॑यद् दे॒वः । यद्विष्णो॑रेक॒-मुत्त॑मं ।

अ॒ग्नयो॑ वाय॑वश्चै॒व । ए॒तद॑स्य प॒राय॑णं ॥ पृच्छामि त्वा प॑रं मृ॒त्युं । अ॒वमं॑ मद्ध्य॒मञ्च॑तुं । लो॒कञ्च॒ पुण्य॑पापा॒नां । ए॒तत् पृ॑च्छामि॒ संप्र॑ति ॥ अ॒मुमा॑हुः प॑रं मृ॒त्युं । प॒वमा॑नं तु॒ मद्ध्य॑मं । अ॒ग्निरे॒वाव॑मो मृ॒त्युः । च॒न्द्रमा᳚-श्चतु॒रुच्य॑ते ।

अ॒ना॒भो॒गाः प॑रं मृ॒त्युं । पा॒पाः स॑म्ॅयन्ति॒ सर्व॑दा । आभोगास्त्वेव॑ सम्ॅय॒न्ति । य॒त्र पु॑ण्यकृ॒तो ज॑नाः ॥ ततो॑ म॒द्ध्यम॑माय॒न्ति । च॒तुम॑ग्निञ्च॒ संप्र॑ति ॥ पृच्छामि त्वा॑ पाप॒कृतः । य॒त्र या॑तय॒ते य॑मः । त्वन्नस्तद् -ब्रह्म॑न् प्रब्रू॒हि । य॒दि वे᳚त्थाऽस॒तो गृ॑हान् ।

क॒श्यपा॑ दुदि॑ताः सू॒र्याः । पा॒पान्नि॑र्घ्नन्ति॒ सर्व॑दा । रोदस्योरन्त॑र् देशे॒षु । तत्र न्यस्यन्ते॑ वास॒वैः ॥ ते ऽशरीराः प्र॑पद्य॒न्ते । य॒था ऽपु॑ण्यस्य॒ कर्म॑णः । अपा᳚ण्य॒पाद॑ केशा॒सः । त॒त्र ते॑ऽयोनि॒जा ज॑नाः ॥ मृत्वा पुनर्मृत्यु-मा॑पद्य॒न्ते । अ॒द्यमा॑नाः स्व॒कर्म॑भिः

आशातिकाः क्रिम॑य इ॒व । ततः पूयन्ते॑ वास॒वैः ॥ अपै॑तं मृ॒त्युं ज॑यति । य ए॒वं ॅवेद॑ । स खल्वैवं॑ ॅविद्ब्रा॒ह्मणः । दी॒र्घश्रु॑त्तमो॒ भव॑ति । कश्य॑प॒स्याति॑थिः॒ सिद्धग॑मनः॒ सिद्धाग॑मनः ॥ तस्यै॒षा भव॑ति ॥ आयस्मिन᳚-थ्स॒प्त वा॑स॒वाः । रोह॑न्ति पू॒र्व्या॑ रुहः॑

ऋषि॑र्.ह दीर्घ॒श्रुत्त॑मः । इन्द्रस्य घर्मो अति॑थिरि॒ति ॥ कश्यपः पश्य॑को भ॒वति । यथ्सर्वं परिपश्यती॑ति सौ॒क्ष्म्यात् ॥ अथाग्ने॑रष्टपु॑रुष॒स्य । तस्यै॒षा भव॑ति ॥ अग्ने॒ नय॑ सु॒पथा॑ रा॒ये अ॒स्मान् । विश्वा॑नि देव व॒युना॑नि वि॒द्वान् । यु॒यो॒द्ध्य॑स्म-ज्जु॑हुरा॒णमेनः॑ । भूयिष्ठान्ते नम उक्तिं ॅवि॑धेमे॒ति ( ) ।