इ॒मा नु॑कं॒ भुव॑ना सीषधेम । इन्द्र॑श्च॒ विश्वे॑च दे॒वाः ॥ य॒ज्ञ्ञ्च॑ नस्त॒न्वञ्च॑ प्र॒जाञ्च॑ । आ॒दि॒त्यैरिन्दः॑ स॒ह सी॑षधातु ॥ आ॒दि॒त्यैरिन्द्रः॒ सग॑णो-म॒रुद्भिः॑ । अ॒स्माकं॑ भूत्ववि॒ता त॒नूनां᳚ ॥ आप्ल॑वस्व॒ प्रप्ल॑वस्व । आ॒ण्डी भ॑व ज॒ मा मु॒हुः । सुखादीन्दुः॑ खनि॒धनां । प्रति॑मुञ्चस्व॒ स्वां पु॒रं ।

मरी॑चयः स्वायंभु॒वाः । ये श॑री॒राण्य॑ कल्पयन्न् । ते ते॑ दे॒हङ्क॑ल्पयन्तु । मा च॑ ते॒ ख्या स्म॑ तीरिषत् ॥ उत्ति॑ष्ठत॒ मा स्व॑प्त । अ॒ग्नि-मि॑च्छद्ध्वं॒ भार॑ताः । राज्ञ्ः॒ सोम॑स्य तृ॒प्तासः॑ । सूर्ये॑ण स॒युजो॑षसः ॥ “युवा॑ सु॒वासाः᳚{14}” ॥ अ॒ष्टाच॑क्रा॒ नव॑द्वारा

दे॒वानां॒ पूर॑यो॒द्ध्या । तस्याꣳ॑ हिरण्म॑यः को॒शः । स्व॒र्गो लो॒को ज्योति॒षा ऽऽवृ॑तः ॥ यो वै तां᳚ ब्रह्म॑णो वे॒द । अ॒मृते॑नावृ॒तां पु॑रीं । तस्मै᳚ ब्रह्म च॑ ब्रह्मा॒ च । आ॒युः कीर्तिं॑ प्र॒जान्द॑दुः ॥ वि॒भ्राज॑मानाꣳ॒॒ हरि॑णीं । य॒शसा॑ संप॒रीवृ॑तां । पुरꣳ॑ हिरण्म॑यीं ब्र॒ह्मा

वि॒वेशा॑प॒राजि॑ता ॥ पराङ्गेत्य॑ (पराङत्य॑) ज्याम॒यी । पराङ्गेत्य॑ (पराङत्य॑) नाश॒की । इ॒ह चा॑मुत्र॑ चान्वे॒ति । वि॒द्वान् दे॑वासु॒रानु॑भ॒यान् ॥ यत्कु॑मा॒री म॒न्द्रय॑ते । य॒द्यो॒षिद्य-त्प॑ति॒व्रता᳚ । अरि॑ष्टं॒ ॅयत्किञ्च॑ क्रि॒यते᳚ । अ॒ग्नि-स्तदनु॑ वेधति ॥ अ॒शृता॑सः शृ॑तास॒श्च

य॒ज्वानो॒ येऽप्य॑य॒ज्वनः॑ । स्व॑र्यन्तो॒ नापे᳚क्षन्ते । इन्द्र॑-म॒ग्निञ्च॑ ये वि॒दुः ॥ सिक॑ता इव स॒म्ॅयन्ति॑ । र॒श्मिभिः॑-समु॒दीरि॑ताः । अ॒स्मा-ल्लो॒काद॑-मुष्मा॒च्च । ऋ॒षिभि॑-रदात्-पृ॒श्निभिः॑ ॥ अपे॑त॒ वीत॒ वि च॑ सर्प॒तातः॑ । येऽत्र॒ स्थ पु॑रा॒णा ये च॒ नूत॑नाः । अहो॑भि-र॒द्भि-र॒क्तुभि॒-र्व्य॑क्तं

य॒मो द॑दात्व-व॒सान॑मस्मै ॥ नृ मु॑णन्तु नृ पा॒त्वर्यः॑ । अ॒कृ॒ष्टा ये च॒ कृष्ट॑जाः । कु॒मारी॑षु क॒नीनी॑षु । जा॒रिणी॑षु च॒ ये हि॒ताः ॥ रेतः॑ पीता॒ आण्ड॑पीताः । अङ्गा॑रेषु च॒ ये हु॒ताः । उ॒भया᳚न् पुत्र॑ पौत्र॒कान् । यु॒वे॒ऽहं ॅय॒मराज॑गान् ॥ “ श॒तमिन्नु श॒रदः॑{15}” ( ) ॥ अदो॒ यद्ब्रह्म॑ विल॒बं । पि॒तृ॒णाञ्च॑ य॒मस्य॑ च । वरु॑ण॒-स्याश्वि॑नो-र॒ग्नेः । म॒रुता᳚ञ्च वि॒हाय॑सां ॥ का॒म॒प्र॒यव॑णं मे अस्तु । स ह्ये॑वास्मि॑ स॒नात॑नः । इति नाको ब्रह्मिश्रवो॑ रायो॒ धनं । पु॒त्रानापो॑ दे॒वीरि॒हाहि॑ता ।